NAGAPI ang De La Salle University (DLSU) Green Spikers ng Adamson University Soaring Falcons, 21–16, 18–21, 19–21, sa pagtatapos ng elimination round ng University Athletic Association of the Philippines Season 88 Men’s Beach Volleyball Tournament sa Sands at SM by the Bay, Nobyembre 29.
Umarangkada ang Green Spikers sa unang set sa bisa ng mga atake ni veteran Andrei Espejo, 13–9, na sinegundahan pa ng pag-init ng opensa ni Von Marata para tuldukan ang unang set sa kanilang pabor, 21–16.
Pagdako sa ikalawang set, nagpatuloy ang pagratsada ng DLSU, ngunit ikinandado ng Adamson ang net at umukit ng magkakasunod na puntos, 6–11, bago tuluyang pihitin ang direksyon ng sagupaan pabor sa mga taga-San Marcelino, 18–21.
Dikdikang tagisan ang ibinalandra ng dalawang kampo sa huling set hanggang sa dominahin ni Espejo ang net at itabla ang talaan, 12–all, ngunit napatid ang Green Spikers sa kanilang sariling errors na nagbigay-daan sa panalo ng Soaring Falcons, 19–21.
Bitbit ang 2–5 panalo-talo baraha, wawakasan ng Green Spikers ang kanilang kampanya sa ikapitong puwesto.