Sinelyuhan ng De La Salle University (DLSU) Lady Spikers ang kanilang unang panalo matapos lusubin ang hukbo ng University of the East (UE) Lady Warriors, 21–12, 21–13, sa pagtatapos ng kanilang kampanya sa University Athletic Association of the Philippines Season 88 Women’s Beach Volleyball Tournament sa Sands at SM by the Bay, Nobyembre 29.
Nangibabaw ang kalkuladong drop balls nina Taft mainstay Sophia Sindayen at Mica Buis upang sikwatin ang kalamangan sa pag-arangkada ng unang set, 14–8, hanggang sa tuluyang ibinulsa ng Lady Spikers ang bentaha sa bisa ng top spin spike ni Sindayen sa long ball zone ng Recto-based squad, 21–12.
Pinutakte ng unforced errors ang Berde at Puting koponan pagdako ng ikalawang set, 9–all, ngunit agad na bumawi ang Lady Spikers nang magpakawala ng mga tirada si Sindayen, na sinabayan pa ng service ace at drop ball ni Buis sa backcourt ng pulang hanay, 21–13.
Ibinahagi ni Buis sa Ang Pahayang Plaridel (APP) na marami silang natutuhan sa torneo. Aniya, “This season marami naman po kaming learnings na nakuha at madami pa po kaming need i-improve pa. Pero next season kasi mas mahaba na preparation namin so babawi kami.”
Bitbit ang 1–6 panalo-talo baraha, winakasan ng Lady Spikers ang kanilang kampanya sa torneo sa ikapitong puwesto.