Katuwang sa paglinang ng wika at kultura: Correa, San Juan, at Buban, kinatawan ng NCCA

14 April 2017
847 Views

nina Marc Daniel Abiño at Hannah Gabrielle Mallorca

ITAGUYOD ang kagandahan ng pambansang wika at kultura―ito ang pangunahing layunin ng National Commission on Culture and the Arts (NCCA). Tungkulin din ng NCCA na isakatuparan ang mga hakbang at proyekto bilang pagtupad sa naturang hangarin.

Sa unang pagkakataon, naging bahagi ng naturang komisyon ang mga propesor ng Filipino Department na sina Dr. David Michael San Juan, Dr. Ramilito Correa, at Dr. Raquel Sison-Buban bilang kasapi ng Subcommission on Cultural Dissemination (SCD). Kasama ang tatlo pang sub-commission, kumakatawan sila sa iba’t ibang cultural at non-government organization sa pagpapayabong ng wika at kultura ng bansa.

 

Layunin ng NCLT

Nahahati ang NCCA sa apat na sub-commission na binubuo ng 19 national committees. Sa ilalim ng SCD makikita ang National Committee on Language and Translation (NCLT) na naglalayong isulong ang paggamit ng wikang Filipino. Maliban dito, binibigyang-diin ng naturang komite ang pagsasalin ng panitikan at iba pang teksto.

Sa kasalukuyan, pangalawang termino na nina San Juan at Correa bilang kasapi ng Executive Council ng NCLT. Nakapagpasa ang mga propesor ng application form upang maging bahagi ng naturang komite.

Naging bahagi sina Correa at San Juan sa naturang komite bilang kinatawan ng Sanggunian sa Filipino (SANGFIL) at Pambansang Samahan sa Lingguistka at Literaturang Filipino (PSLLF). Paliwanag pa ni Correa, “Pwedeng individual pero dapat meron kang maayos na profile or curriculum vitae para makita nila ang qualifications mo.”

 

Katayuan sa komisyon

Bilang vice head ng NCLT, tungkulin ni San Juan na tulungan ang head sa pamamahala ng mga hakbang at kilos ng komisyon. Bahagi rin nito ang pagpupulong sa national advisory board upang magbigay ng mungkahi sa mga commissioner hinggil sa usaping pambansa.

Dagdag pa ni San Juan, isa sa mga ipinagpapatuloy ng komite ang mga hakbang tungo sa pagsusulong sa Filipino bilang wikang panturo. Bahagi pa niya, “Pipilitin din naming suportahan ang Tanggol-Wika sa mga aspekto ng lobbying sa loob ng gobyerno at pagpapalawak ng network pa ng mga nagtataguyod sa wika at kultura ng Pilipinas.”

Inilahad din ng propesor ang pagpopondo ng komisyon sa mga proyekto at pagsasagawa ng mga pagsasanay sa paggamit ng Filipino bilang medium of instruction.

Katulad ni San Juan, kabilang din si Correa sa Executive Council bilang assistant secretary. Aniya, “Kapag nandoon ang secretary, lahat kami may mga pinag-aaralan na project proposal […] kapag ang project ay related sa cultural heritage or or tungkol sa translation, ina-approve namin iyon.”

Gayunpaman, hindi sila maaaring magbigay at maging bahagi ng mga proyektong pangwika mula sa Pamantasan dahil hawak ng mga kasapi ng NCCA ang mga usaping pambansa. Nagkataon lamang na nanggaling sina San Juan, Correa, at Buban sa DLSU dahil kumatawan sila sa iba’t ibang organisasyon noong naging bahagi sila sa naturang komisyon.

 

Tungkulin sa sariling wika

Naninindigan si Correa na hindi dapat mawala ang Filipino sa kolehiyo dahil nakasaad sa konstitusyon ng bansa ang tungkuling payabungin ito bilang isang wika. Dagdag pa niya, mas mapaiigting ang kultura ng bansa kapag ginagamit ang pambansang wika dahil kakambal ng wika ang kultura.

Ipinagmamalaki naman ni San Juan ang FILKOMU at FILDLAR dahil dito nahihikayat ang mga estudyanteng pangalagaan ang sariling wika. Bahagi pa niya, “Nire-revise namin yung syllabus para pagdating ng next school year […] may bago na tayong syllabus so mayroong tungkol sa pop culture, research, etc. Ine-explore pa yung possibility at ipapa-approve namin later sa admin.”

Hinihikayat din ni San Juan na pahalagahan ang wikang Filipino dahil inilalapit nito ang mga Pilipino sa isa’t isa. Mas mauunawaan umano ng mga estudyante ang mga suliranin ng pagkaraniwang Pilipino kung gagamitin nila ang kanilang wika. Dagdag pa ng propesor, makaaambag ang paggamit ng wikang Filipino sa paglutas ng mga suliranin sa bansa.

Naniniwala naman si Correa sa katuturan ng pagiging mulat sa wikang Filipino bilang pagpapatibay sa identidad bilang Pilipino. Pagwawakas niya, “[…] Bahagi ka ng wika, bansa, at mamamayan. Dapat ingatan, pangalagaan, [at] isulong ang lahat ng mga gawain [para sa] paglilinang ng wika at kultura ng [Pilipinas]”

 

Retrato – kuha ni Arah Reguyal

Tweet about this on TwitterShare on FacebookEmail this to someone

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

Login

Lost your password?