Casa Santa: Tahanan ng Paskong Pilipino

14 December 2016
808 Views

nina Michelle Dianne Arellano, Ma. Carmina Dieta, John Emer Patacsil, at Gabriel Frances Timog

Sa pagsapit ng malamig na simoy ng hangin at mahahabang gabi, kanya-kanyang pakulo ang bawat pamilya sa pagsabit ng nakapupukaw na mga parol sa kanilang tahanan. Tila wala nang makapapantay pa sa pagkasabik na nadarama ng mga tao sa pagsalubong sa pinakamasayang araw ng taon. Para sa mga Pilipino, kadalasang nagsisimula ang ating paghahanda para sa okasyong ito tuwing darating na ang buwan ng Setyembre.

Tila isang pangarap ng mga Pilipino ang maramdaman ang simoy ng Kapaskuhan sa buong taon. Maging sa buong mundo, nakatatak din sa ating kultura ang pinakamahabang oras ng paghahanda para dito. Isang museo ang tumalima at nagbigay ng pagkakataon para sa mga Pilipino na ipagdiriwang ito sa mas mahabang panahon, anomang petsa ng taon.

 

Pasilip sa mundo ng Casa Santa

Noong 1994, nabuo ang Casa Santa bilang isang atraksyon na may temang Pasko sa syudad ng Antipolo. Nakapaloob ang museo sa Jardin de Miramar kasama pa ang ibang mga lugar na pinagdarausan ng iba’t ibang mga selebrasyon gaya ng kasal, kaarawan, at iba pa. Matatagpuan sa lugar na ito ang iba’t ibang koleksyon ng Santa Claus na binili pa sa ibang bansa. Sa pagpasok sa museo, agad na bubungad sa mga bisita nito ang mala-pelikulang uri ng bahay na binabalutan ng mga palamuti at disenyo.

12-14-16-casa-santa-kuha-ni-arah-reguyal

Kamangha-mangha ang dami ng mga figurine na makikita sa loob ng Casa Santa na mayroong iba’t ibang anyo, laki, materyales at tema. Ayon kay Princess Reyes, Sales and Marketing officer ng Casa Santa, nasa 3,168 ang kasalukuyang bilang ng mga Santa Claus memorabilia na matatagpuan. Mapapansin din ang painting sa kisame na depiksyon ng pagsakay ni Santa Claus sa kanyang paragos (sleigh).

Nahahati sa dalawang palapag ang museong ito. Sa unang palapag, may dalawang temang nagpapakita ng magkaibang tema tuwing Pasko: ang Santa’s Village at ang Children’s Room. Ayon kay Reyes, nabuo ang maliit na kwartong ito noong 2015 lamang at may temang White Christmas. Nakapaloob dito ang samo’t saring disenyo gaya ng bughaw na ilaw at mga Christmas train. Inilalarawan ng kwartong ito ang iba’t ibang gawain ng mga tao tuwing Pasko tulad ng pamimili ng regalo, pangangaroling ng mga bata, at pagmamasid sa nagagandahang Christmas tree.

Ilang hakbang lamang mula sa pinto ng Santa’s Village, matatagpuan ang ikalawang bahagi ng silid at tinatawag itong Children’s Room. Makikita sa bahaging ito ang isang malaking espasyong nagpapakita ng isang tipikal na silid ng isang batang puno ng mga dekorasyong pampasko. Nakalatag dito ang mga kasuotan at mga laruang sumisimbolo sa okasyon at mayroon ding mga guhit sa dingding na naglalarawan sa panahon ng taglamig.

Sa dinami-rami ng mga figurine na makikita sa Casa Santa, kapansin-pansin pa rin ang mga lumang disenyong binili pa noong 1994, taon nang itayo ang museo. Bunsod ng madalas na pagluwas sa ibang bansa ng may-ari, patuloy na nadagdagan ang bilang ng palamuting inilalagay niya sa koleksyon. Ibinahagi ni Reyes na mayroon pang ibang hindi itinatampok sa museo dahil sa kanyang planong baguhin ang ibang disenyo ng lugar.

 

Buong taong pagdiriwang ng Pasko

Para sa mga bata, ang imahe ni Santa Claus ang isa sa mga sumisimbolo sa Kapaskuhan. Kaliwa’t kanan ang mga makikitang imahe nito lalo na’t palapit na ang araw ng Pasko. Gayunpaman, para sa Casa Santa, hindi lamang tuwing sumasapit ang pasko lumalabas ang imahe ni Santa Claus.

Sa buong taon, ramdam ng kahit sinomang pumupunta sa Casa Santa ang diwa ng Pasko. Pagbabahagi ni Reyes, “Hindi pa ‘-ber months’ nararamdaman na nila yung Pasko, tapos maganda kasi open siya all year round.” Bagamat mas marami pa ring bumibisita sa museo habang papalapit ang Pasko, marami pa ring dumadayo rito para makita ang koleksyon.

Ngiti ang handog ng Casa Santa sa mga taong bibisita rito. Malayo man sa laki ang museong ito kung ikokompara sa mga naunang naitayo sa ibang bansa, makikita pa rin ang ligaya at saya na bitbit pauwi ng mga taong nagpupunta rito. Madalas ding pinupuntahan ang museong ito tuwing mayroong mga fieldtrip ang iba’t ibang eskwelahan.

12-14-16-casa-santa-kuha-ni-arah-reguyal1

“[Mas tinatangkilik ito ng mga bata] kasi naniniwala sila kay Santa Claus. Kapag bata, [madalas magugulat silang] ‘ay wow, ang daming Santa Claus!’” kwento ni Reyes. Kadalasan ding may mga pumupuntang dayuhan sa museo kahit hindi pa panahon ng Kapaskuhan.

Naniniwala si Reyes na kahit tila buong taon ang pagdiriwang nila ng Pasko, hindi nawawala ang pagpapahalaga nila para dito. Bagkus, pinaiigting pa nila ang kahalagahan ng Kapaskuhan sa mga Pilipino. “Syempre kapag may pumunta rito, kahit hindi Pasko, mararamdaman nila, kunwari, January o February, mararamdaman nila na Pasko pa rin kahit hindi na season ng Pasko,” pagtatapos niya.

 

Tunay na diwa ng Pasko

Ilang araw na lamang at maririnig na ulit ang mga tanyag na awiting pamasko at mga sumisigaw ng “Namamasko po!” Makikita na rin ang mga regalong nakabalot sa samo’t saring makukulay na papel sa ilalim ng mga Christmas tree at idagdag pa ang mga kaakit-akit na ilaw at halo-halong palamuting nakasabit saan ka man lumingon.

Sa darating na panahon na ito, maisapuso sana natin ang mas malalim na kahalagahan ng pagdiriwang na ito—kasiyahan, pagmamahalan, at pagbibigayan. Hindi kailanman magiging batayan ang edad, panahong nakalaan para sa paghahanda, at paraan ng pagdiriwang sa kaligayahang kayang ihandog sa paggunita ng Kapaskuhan. Mahalaga lamang na maikintal natin sa ating mga puso ang importansya nito at isabuhay ang tunay na kahalagahan nito.

Gaya ng sinisimbolo ng imahe ni Santa Claus, iparamdam sana ng bawat Pilipino ang kahalagahan ng pagbibigayang walang hinihinging kapalit, Pasko man o hindi.

 

Retrato – mga kuha ni Arah Reguyal

Tweet about this on TwitterShare on FacebookEmail this to someone

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

Login

Lost your password?